الخميس، 28 أبريل 2011

بتحصل على فكرة

- تاسوني عايزة اتكلم معاكي في موضوع .
- طبعا يا حبيبتي .. خير؟!
- انت قلتي النهاردة اننا ماينفعش نخلي ناس مش مسيحيين اكتر ناس اصحابنا .. صح ؟؟
- لا هو مش ماينفعش ... احسن بلاش ...
- طيب انا اكتر واحدة صاحبتي في المدرسة مسلمة ..
- ليه مخلياها اكتر واحدة صاحبتك ؟؟ هو انت معكيش ناس مسيحيين ؟؟
- لا معايا .. بس انا مش بحبهم و هم دايما بيدايقوني ...
- هو انت ما سمعتيش الحكاية اللي قلتها النهاردة ؟؟ ... البنت اللي صاحبتها اتفقت مع الناس الوحشين و خطفوها ..
- بس صحبتي دي مش كدة ... دي بتحبني اوي .. و مش هتعمل كدة ....
- مين قالك ؟؟ .. المفروض ناخد بالنا .... يعني تبقي زميلتنا و بنحبها و كل حاجة .. بس بلاش صحبتنا دي ...
- بس انا مش عايزة اخاصمها ..
- مش هتخصميها .. بس قللي الصحوبية شوية ... و صليلها ربنا يخليها تبقى مسيحية ...
-هي مش هتدخل السما بجد يا تاسوني ؟؟
- لا طبعا .... هم مش هيدخلوا السما ..
- و انت مين قالك انهم مش هيدخلوا السما ؟؟ مش المفروض ان بابا يسوع هو اللي بيحدد ؟؟
- ما ينفعش حد مش مؤمن بالمسيح يدخل السما ...
- طيب و ايه شهداء الثورة دول ؟؟
- دول مش شهداء ... دول ناس ماتو في الثورة عادي .. اللي شهداء هم اللي زي شهداء كنيسة القديسين كدة و دول اللي هيدخلوا السما .. اما شهداء الثورة فلأ
- يا تاسوني انا ساعات بتجيلي افكار وحشة اوي ....
- افكار اية ؟؟
- ساعات بفكر ان ربنا مش موجود .. و انكم بتضحكو علينا ...
- يا خبر !!!! .... لية كدة ؟؟
- مش عارفة .. هو انا بقعد افكر .. و الفكرة كدة بتيجي في دماغي ....
- بس حتى لو احنا الاساتذة و التاسونات بيضحكو عليكي ... ابونا كمان هيضحك عليكي ؟؟
- هو مش ممكن ابونا دة يكون غلطان ؟؟!!!!
- ابونا بيرشده الروح القدس نفسه .. و اكيد الروح القدس مش هيغلط ...
- بس ساعات ابونا بيقول كلام مش بقتنع بيه ..
- دي كلها افكار من الشيطان يا حبيبتي .... لما تجيلك .. ارشمي الصليب و اقعدي صلي ....
- يعني ما افكرش .... ؟؟!!
-لا طبعا فكري .. بس خدي بالك ان ساعات افكار بتيجي من الشيطان .. المفروض منيديلوش فرصة يضحك علينا ... و اول ما تجيلنا افكاره نبطل التفكير فيها على طول ...
- حاضر ...
- فيه حاجة كمان ممكن اقولك عليها ...
- طبعا يا تاسوني ..
- مش احنا بقينا بنات كبار خلاص .. في تالتة ابتدائي اهو ...
- ايوة ..
- يبقى ماينفعش اللبس اللي احنا لابسينه دة ..
- يعني اية ؟؟
- يعني عيب نلبس النص كم القصير دة .... بنات المسيح ميلبسوش كدة ... قولي لماما تطولنا الكم شوية ....
- و اية المشكلة ؟؟ هو ايدي حاجة عيب ؟؟
- لما الاساتذة يشوفوا درعنا كله كدة مش دي حاجة تضايق ؟؟
- لأ ....
-المفروض نسمع الكلام .. و ابن الطاعة تحل عليه البركة ..
- حاضر ...
- حضرلك الخير يا حبيبتي ...


ملحوظة:
- تاسوني : المُدرسة اللي بتعلم الاطفال في الكنيسة في دروس مدارس الاحد كل اسبوع .. المفروض انها بتقولهم كلام ربنا ..

فيه من دة كتير بالمناسبة .. و حصل قدامي و معايا - و انا طفلة - اكتر من موقف من دول ... دة غير المواقف اللي بتحصل معايا و انا كبيرة زي لما سالت عن سلوى عادل - اللي قتلوها اخواتها بعد ما اسلمت .. معظم الاقباط عملوا فيها هبل - .... سايبلكم الحكم ......... عليك العوض يا رب ...... عشان نعرف ان مافيش حد احسن من حد ... و قبل ما نشيل الشظية اللي في عنين اخواتنا نطلع الخشبة من عنينا احنا الاول ....
                                                       ميريت

هناك 5 تعليقات:

  1. للأسف اكتسبنا اشياء مش من المسيحية كتير

    ردحذف
  2. بدل ما نكون نور العالم وملح الأرض ونأثر في الناس بقينا بتأثر بأسوء ما في العالم
    ما فيش حل في إيدينا غير اننا منسكوتش ونكشف عيوبنا علشان أسوء ما في الأقباط هو إحساسهم انهم افضل شعب وهما عكس كده
    بس بقي نستحمل الإتهامات والرفض الإجتماعي , يعني انتي وانا واللي زينا مش كفاية هنبقي مرفوضين من المسلمين لا ومن الأقباط كمان . هتقدري؟

    ردحذف
  3. أنا مش عارف إذا كنتي قريتي الموضوع ده ولا لأ بس هو ده الحل في رأيي أننا نسمعهم صوتنا ونواجهم مع ضميرهم
    http://logic-emile.blogspot.com/2011/04/blog-post_21.html

    ردحذف
  4. مفيش صوت تسقيف!
    ارفع لك القبعة..و فروة رأسى اذا اقتضى الأمر!
    D:

    ردحذف
  5. استاذ اميل ... كنت قريت موضوعك فعلا .. و عجبني جدا .. و ممكن اقدر اقول انه هو اللي خلاني اكتب البوست دة ...
    افتكرت اللي كان بيحصل زمان و ازاي كون جوايا فكرة انعزالية عن الغير المسيحيين و ازاي تعبت اني اتخلص من الفكرة دي ..
    و افتكرت كلام الخادمات لى لما شرحت للاطفال ان اللي بيموت عشان مصر بنسميه شهيد الوطن .. و اننا مش في ايدينا مفتاح الملكوت و مش من حقنا نحكم .... كلامك فكرني بنظرة الخادمات دول لى و لسان حالهم بيقولي انت هتهرطقي و لا اية ...
    افتكرت كمان الكنيسة الاولى .. ازاي مدرسة اسكندرية اللي كانت تابعة للكنيسة كانت المنبع الرئيسي للفلسفةللعالم كله في عصرها ..
    افتكرت اختلافات الاباء في الاراء بسماحة .. اللي كل واحد منهم بنعتبرهم قديس من قديسين الكنيسة ... اتحسرت اوي على حالنا .... الكنيسة القبطية عظيمة و غنية .. لكن ولادها مش قادرين يستوعبوا للاسف ....
    طول حياتي كنت لما بسكت صوت ضميري لحظة كنت بمر في حالة اكتئاب فظيعة .. و دلوقتي مش ناوية اجامل حد على حساب ضميري دة ... هعمل اللي هشوفه صح ..

    ردحذف